افتحوا للشمس باب
خلوا أحلامنا اللي هربت
ترجع لنا بعد الغياب
خلو شمس العمر تظهر
تطفي في قلوبنا العذاب
قوموا يلا
افتحو كل البيبان
خلو نور الشمس يوصل للحيطان
كفاياكو ضلمه
كفايه حبس احلامي الغريقه
سيبوها حره لو دقيقه
كفاياها عايشه من سنين في سواد وعتمه
سيبوها مره تعيش في نور
سيبوها تنحت قصرها بين الصخور
أو حتي تحفر قبرها في وضوح ونور
افتحو للشمس باب
*****
افتحوا للشمس باب
لأ افتحولها ألف باب
خلوا نورها يضمنا
دفئها هيلمنا
افتحو لشعاعها طاقه
تشق بيها قلب الضباب
افتحوا للشمس باب
وارمو أحزانكم وراه
خلو أحلامكم شراع
فوق بحار الحزن يجري
لحد ما تلاقوا النجاه
فوق همومكم دوسو دايماً
واسرقوا فرح الحياه
ويَا شمس بكره دايماً
الحياه مفيهاش سراب
افتحوا للشمس باب
*****
افتحوا للشمس باب
قوموا يلا كسروا كل القيود
كسروا كل الحواجز
اوعوا عنها يحوشكوا حاجز
لو حتي هتزيد السدود
افتحولها الباب وخلو
نورها لقلوبكو الإمام
ويا نور الشمس يلا
اهدموا حيطان الظلام
افتحوا لقلوبكوا منها
سكه للنور والورود
افتحوا للشمس باب
****
افتحوا للشمس باب
لو حتى كان خرم فـ تابوت
طول ما نور الشمس طالع
الحب مش ممكن يموت
جوه قلبك بص .. دور
من قبل م الأيام تفوت
واطرح الأحزان في عمرك
وشق بالصرخه السكوت
ما هو طول ما جوانا الأمل
هنلاقيلها ألف باب
افتحوا للشمس باب
هناك تعليقان (2):
افتحوا للشمس باب
خلي سُكاتك يتكلم
والقلب بكلامه
يتبسم
والضحكة القديمة
ترجع لك..
....
افتحوا للشمس باب
اردموا للحزن
كل سرداب
ف مرارة الوجع
اضحكوا
هو مين قال ان
للضحك اسباب
..
ف عز قهرتك
والدنيا كلها
بتكسّرك
اطلع اتمختر
ولا منهم يهمك
.....
تامر ..
طبعا انت بتشبع على التفاعل ..
اعمل نفسك مش واخد بالك ..
تعرف يا تيتو
فعلا فيه ناس بتسجن نفسها
و بتتقوقع و تعمل بيات صيفي شتوي
ربيعي خريفي
يا ريتهم فعلا يسمعوك
و يفتحوا للشمس باب
شفت بقى لما فتحت التعليقات
انت كده فتحت للشمس باب
إرسال تعليق