هذيان مشتاق

وبشتاقلك

وشايل شوقي في كفوفي



ومحتاجلك



تحسيني . تضميني



تنسيني وجع خوفي



ومشتاقلك



يا نور الشمس فـ جبيني



يا نسمة صيف بتحييني



يا ورده في خريف العمر



وشوكها في شراييني



وبشتاقلك

أنا حبي ليكي بحور

أنا حبي ليكي بحور

بتصب في وريدي

تباني عقلي مني يدور

وتترعش إيدي

حبك دا شمس ونور

نغمه في تغريدي

بعدك أنا مكسور

ولقاكي يوم عيدي

إحساس ملعون

لما حبيبك يأسي ويظلم

لما دموعك توجع تإلم

لما تلاقي أحلامك كدبه

وجراحك رافضه تتلملم

لم يفوت العمر ويخلص

وانت بترفض يوم تتعلم

.. .. .. ..

الحب دا كدبه وعشناها

ضعنا وضاع العمر معاها

كدبه كبيره ولعبه حقيره

إحنا اللي بإيدنا صنعناها

كدبه وزرعت جوا قلوبنا

جرح يعيش العمر معاها

واحنا يا قلبي الحق علينا

ليه كدبناها وصدقناها ؟

.. .. .. ..

لما يموت جواك إحساسك

وجراحك تيجي من ناسك

لما تحس إنك غرقان

بتدور وتلف علي خلاصك

حزن وعشش جوا ضلوعك

والآهه بتكتم أنفاسك

لما يشوفو الدمعه في عينك

ضحكتهم تجرح إحساسك

.. .. .. ..

لما يهون الحب عليهم

وآلامك تبقي علي إيديهم

وكل ما تيجي تداوي جراحك

هما يدوسوا قوي برجليهم

داسوا خلاص علي كل مشاعرك

وايه اللي فاضلك عنديهم

كل حكايتك كانت كلمه

من حرفين شطبوها بإيديهم

لما يشوفو مشاعرك تنزف

وتبقا الضحكه ملو عنيهم

.. .. .. ..

افتحوا للشمس باب

افتحوا للشمس باب

خلوا أحلامنا اللي هربت

ترجع لنا بعد الغياب

خلو شمس العمر تظهر

تطفي في قلوبنا العذاب

قوموا يلا

افتحو كل البيبان

خلو نور الشمس يوصل للحيطان

كفاياكو ضلمه

كفايه حبس احلامي الغريقه

سيبوها حره لو دقيقه

كفاياها عايشه من سنين في سواد وعتمه

سيبوها مره تعيش في نور

سيبوها تنحت قصرها بين الصخور

أو حتي تحفر قبرها في وضوح ونور

افتحو للشمس باب

*****

افتحوا للشمس باب

لأ افتحولها ألف باب

خلوا نورها يضمنا

دفئها هيلمنا

افتحو لشعاعها طاقه

تشق بيها قلب الضباب

افتحوا للشمس باب

وارمو أحزانكم وراه

خلو أحلامكم شراع

فوق بحار الحزن يجري

لحد ما تلاقوا النجاه

فوق همومكم دوسو دايماً

واسرقوا فرح الحياه

ويَا شمس بكره دايماً

الحياه مفيهاش سراب

افتحوا للشمس باب

*****

افتحوا للشمس باب

قوموا يلا كسروا كل القيود

كسروا كل الحواجز

اوعوا عنها يحوشكوا حاجز

لو حتي هتزيد السدود

افتحولها الباب وخلو

نورها لقلوبكو الإمام

ويا نور الشمس يلا

اهدموا حيطان الظلام

افتحوا لقلوبكوا منها

سكه للنور والورود

افتحوا للشمس باب

****

افتحوا للشمس باب

لو حتى كان خرم فـ تابوت

طول ما نور الشمس طالع

الحب مش ممكن يموت

جوه قلبك بص .. دور

من قبل م الأيام تفوت

واطرح الأحزان في عمرك

وشق بالصرخه السكوت

ما هو طول ما جوانا الأمل

هنلاقيلها ألف باب

افتحوا للشمس باب

ويفضل حبنا باقي

بلم جروحي جوايا

وألم معاها أشواقي

وبنسى في بعدك الأفراح

ويفضلي الأسى باقي

يا نبض يدب في عروقي

يا دائي ويا ترياقي

بعت القلب يهديكي

ورودي ويا أشواقي

يمر العمر يا عمري

ويفضل حبنا باقي

ويفضل حبنا باقي

ويفضل حبنا باقي

ولا يهمك

ولا يهمك ...جراح بجراح
وعيش علي ضفة الأحزان
وكان من إمته بيهمك
تعيش مرتاح
ما طول عمرك
يا قلبي بتعشق الحرمان
ولا يهمك ...
ظلامك غطى كل صباح
سواد ف سواد
بقا عمرك
وطول عمرك
مقضيها مع الأحزان
ولا يهمك ...
يزيد همك .. يزيد وجعك
وإيه يعني
يفوت العمر ويعدي
وتتمنى
بإنك ساعه تتهنى
تبات فرحان
تلاقي الفرح سوقه انفض
يجيك الرد
صوت عالي
لنغمة ناي
بتتألم في أنفاسك
تشوف ناسك
في عز الحوجه بتبيعك
ومين غيرهم يمد الإيد
يشيل همك
ويمسح وطأة الأحزان
ولا يهمك ....
تموت م الجرح أو م الخوف
ماهيش فارقه
ما دام الصوره مقلوبه
نبات ونفوسنا مغلوبه
ونرجع تاني نرسمها
قلوب وحروف
وننسى الخوف
وبنغامر في وش الريح
بقلب جريح
ما نتعلم
بنبض قلوبنا بنسلم
خجل وكسوف
ندوب في العمر كام مره
ولا مره
نشوف في حياتنا ضحكايه
تشق الخد دمعايه
وبدموعنا
بنملى القلب ونعبي
وبنخبي
علي الأحباب مآسينا
وتنسينا ما تدينا
يا دنيا في يوم
سوى ألمك مع همك
ونحمد ربنا المنان
دا من فضله
وهبنا نعمة النسيان
ولا يهمك ...